Maoni Ya Wateja

WAZIRI UMMY AIPA MIEZI MIWILI TMDA KUFANYA UTAFITI WA SHISHA.

Posted on: May 31st, 2022

NA WAF - DOM 

Waziri wa Afya Mhe. Ummy Mwalimu ametoa miezi miezi miwili  kwa TMDA kushirikiana na Tume ya madawa ya kulevya nchini kufanya  utafiti wa shisha kuwekwa madawa ya kulevya.

Amebainisha hayo leo wakati akitoa tamko kwenye maadhimisho ya siku ya kutotumia tumbaku duniani yenye kauli mbiu isemayo "Tumbaku:tishio la mazingira yetu" kwenye viwanja vya Bunge jijini Dodoma.

Amesema,  "Maelekezo yangu ni kufanya tathimini ya bidhaa hizi ili kulinda afya za jamii kwani kufanya biashara ya shisha ujue unafanya kosa la jinai, Sheria ya kudhibiti  matumizi ya bidhaa za tumbaku nchini sura ya 121 haijatekelezwa kikamilifu, TMDA mfanye tathimini kwa kina". Amesema Waziri Ummy. 

Sambamba na hilo, Waziri Ummy amesema, Magonjwa mengi yasiyo ya kuambukiza yamekuwa yakiongezeka  siku hadi siku na kuleta maradhi mbalimbali yanayosababishwa na matumizi holela  ya bidhaa za tumbaku. 

"Jamii inatakiwa kupunguza au kuacha  kabisa matumizi ya tumbaku au bidhaa zake kwa ajili afya zetu, kwani wanaotumia bidhaa ya tumbaku zaidi ya asilimia  50 wanafariki. 

Aidha, Waziri Ummy amesema, takribani vifo 14,700 kwa mwaka hutokana na matumizi ya tumbaku na asilimia 8.7 ya watanzania sawa na watu milioni 2.6 hutumia tumbaku nchini. 

Hata hivyo, amesema, uchunguzi unaonesha kuwa takribani asilimia 65 ya wavutaji hutupa vichungi vya sigara barabarani, kwenye fukwe za baharini na maziwa. Vilevile katileji nyingi za plastiki za sigara za kielektroniki huishia kutupwa kwenye mifereji ya maji na barabarani na hivyo kusababisha uharibifu mkubwa wa mazingira. 

Pia, amesema watu wengi huathirika na moshi wa sigara katika maeneo ya kazi, kwenye baa, kumbi za starehe na migahawa  ambapo utafiti ulionesha kuwa asilimia 77 ya watu huvutishwa sigara kwenye baa, asilimia 31.1 kwenye migahawa na asilimia 13.8 majumbani. 

Kwa mujibu wa takwimu za Shirika la Afya Duniani (WHO), utumiaji wa bidhaa za tumbaku husababisha vifo kwa karibu nusu ya watumiaji wake na zaidi ya watu takribani milioni 8 hufa kila mwaka duniani kwa sababu ya matumizi ya tumbaku. 

Vilevile milioni 7 ya vifo hutokana na matumizi ya mojakwa moja,wakati milioni 1.2 ni kutokana na utumiaji wabidhaa za tumbaku usio wa moja kwa moja.